خطاهم اللي داروه، قبلوا جميل هانوا به علي موح الخطى مو موح، الموح موح لنيا يا علم بجروحي عليك رميت، نموت كان ما لقيت لي دوا. العمر كان فيه طعمة، تكون هي مغالاتي لكم. من كثر يا عزيز غلاك، تظلم ندير روحي ظالمك. خْناقي العين مْسكت، تقول نا اللي باعدتهم. بنار الغلا ميكول، محط ايد مني ما سلم. تعقيد والجدايل فتل، العين في قديمين حاصلة. قديم ما علينا فيه، ارفع يديك يا ياس ع الجدد. لهن زمان في التقهير، م الياس غير لنظار يحملن. لا يهون من عليك يغيب، ولا دمع جياباً لهم. في الكبد نازلين بثقل، عْزاز نين في دمي جرو. متماضي غلاك معاي، ننساك كيف وانت قرعتي. ملقى شين يبي عزم، ملاقاة الغنايا للغني. العين في عقاب العمر، دكنوني علي نار كمضت. ان ضاع في رجاك العمر، حلال يا عزيز مصدقه. عليك يا عزيز إن غبت، اعرف معاك نيتي حاضرة. معاه لا نقص لا زاد، خطا عزيز جا دوب خاطري. كمين نار ضاق العقل، حمّال غير في التالي شكا. متواجلات شور ضياع، يزّابَن غلانا وعمرنا. مغير لذعوك بنار، تكواي مو على قيس الوجع. تعال يا بعيد الدار، كلت كبودنا طولة الرجا. برموشها تحايي فيه، الجرح جا في العين بيدها. العين شور دار عزيز، وديتها وما وديتها. بلا امّاطلة يا قسم، مليت م الرجا قول قولتك. نحسابها أيام تزول، حسيسة أمراض اطّاولت. في الباينة دوا ما جاب، والغابية عدم دايرتلنا. غلاك هو صْبَيّ العين، والباقي خيالات كلهن. ممسوك غير في ملاقاة، العقل يا غوالي عندكم. مادام كل شي بالقسم، اقعد بلاش يا شوق خاطري. بلاك مالهنش طْعَمَة، شينات يا عزيز ايامنا. مصهودة بنار غلاك، الكبد ياللي ماتندري. مقطوع يا العين العذر، وتّي دموع واهي دارهم. غني من دناه أيّست، يكفي مغير طرواه سادني. دناك وانت فاضي كنت، طعمة يا غني فاتت عليْ. كمل مساقطة في الكتر، الهدب وين ما باد م البكا. عْزاز وَسّدوك سمور، وغطوك بالمهاياة والبكا. اليل تاخذه تصنيت، تريد حس بكّاي تعمده. اللي هنا غير خيال، نحلف عليه عقلي عندكم. برمت نصيب في لوهام، العين ما بكت نين أيّست. اللي ما غلا ضاقوه، سبحانه منيش يموّتُو؟ بشويش يا القسم وْجِيبْ، عْزاز نين فيدي تحطهم. العقل ما جديد لهاه، يبكي بغيض ما زال ع القدم. ننسوك في النهار بدوج، يلفى الليل ويجي جايبك. بالحيل يا نصيب جهدك، صبى معاي راني نريدهم. تستيه في خلا لوهام، العمر ما مشى غير هكّذي. هْمدت نين راق العقل، عْملت خير فينا نارهم. ردناه غير راد الغير، والغير راد غيره وسيبه. بنارك تْطارح فيه، العقل وين ما راق تلذعه. حسايف العين كبار، تنظر عزيز في يدين غيرها.
موضوع: خواطر واشعار 
الأحد يوليو 29, 2012 6:46 pm